Ukrainanıñ Yuqarı Radasınıñ Avropa Şurası Parlament Assambleyasındaki daimiy delegatsiyasınıñ başı, "Halq hızmetçisi" fraktsiyasından halq mebusı Yelizaveta Yasko, Qırım ilhaqına qol tutuv içün cinaiy mesuliyet aqqında qanun leyhasını azırlay.
Bunı Yasko tünevin ukrain telekanalındaki siyasiy şounıñ efirinde ayttı, bildire "Ukrinfrom".
"Aytmaq isteyim ki, şimdi parlamentte azırlağanım teşebbüs pek müimdir - bu işğalniñ tanımaması aqqında qanun. Vaziyetimiz nedir - sıq-sıq Rusiye tasvirleri cemiyetimizni parçalay. Beşinci kolonnamız bar, çoqusı Qırım işğaline açıq qol tutıp, Moskovağa bara. Menimce, Ukrainada böyle, atta parlamentimizde bar olğan, erbaplar içün cinaiy mesüliyetlik olmalı", - dedi Yasko.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
