Fevralniñ 7-nde Ukraina Yuqarı Radası Avropa Birligi ve NATO azalığına taba strategik kurs tüzetüvleriniñ Anayasada pekitilmesine dair qanun leyhasını ekinci oquvda qabul etti.
Bu qararğa 334 halq deputatı qoltuttı, dep bildire Radio Svoboda.
Qanun leyhası qabul etilmezden evel Ukraina prezidenti Petro Poroşenko deputatlar ögünde sözge çıqtı. O, Ukraina AV ve NATO azası olacağından şübhesi olmağanını ayttı.
Noyabrniñ 22-nde Yuqarı Rada Avropa Birligi ve NATO azalığına taba strategik kursqa dair Anayasa tüzetüvleriniñ prezident qanun leyhasını birinci oquvda qabul etken edi.
Bundan evel Ukraina Anayasa mahkemesi işbu vesiqanı Anayasağa uyğun dep tanığan edi.
Anayasa tüzetüvleriniñ ekinci oquvda ve umumen qabul etilmesi içün birinci oquvdan soñ kelecek sessiyada olarğa eñ az 300 deputatnıñ rey bermesi kerek edi.
