Ukrainağa qarşı istilâdan zarar körgen siyasiy mabüsler ve qorantalarını içtimaiy ve uquqiy qoruv aqqında üç qanun leyhası Yuqarı Radağa berildi. Teşebbüsçisi Ukraina prezidenti Volodımır Zelenskıy olğan №6104, 6105 ve 6106 qanun leyhalarınıñ metinleri Ukraina Yuqarı Radasınıñ saytında derc etildi.
Halq deputatı Rustem Umerovnıñ Facebook saifesinde bildirgenine köre, №6104 qanun leyhası «Ukrainağa qarşı silâlı zıddiyet neticesinde azatlıqtan marum etilgen şahıs statusını aluv mehanizmini qolaylaştırmağa ve siyasiy mabüs ve qoranta azalarınıñ qoşma içtimaiy ve uquqiy kefaletlerini kirsetmege» teklif ete.
Umerov, №6106 qanun leyhası «Kreml tarafından qanunsız tutulğan insanlarnı azatlıqtan marum qalğan müddet vaqtında ve azat etilgen soñ altı ay devamında berli esabatı mecburiyetinden serbest tutmağa» teklif ete, bu böyle esabat berilmegeni içün cezalarnı qullanmağa imkân berecek, dep bildirdi.
№6105 qanun leyhasınıñ añlatuv tezkeresinde vesiqa Ukraina cinaiy uquq bozuvları Kodeksine Ukrainağa qarşı silâlı istilâ neticesinde şahsiy azatlıqtan marum etüv meseleleri komissiyasınıñ qanuniy talaplarına riayet etmeme içün mesüliyet aqqında yañı 188-57 maddesini ilâve etmege teklif ete, dep añlatıla.
Ukraina Yuqarı Radası Rusiye işğal etken Qırımda qırımtatarlarnıñ aqlarını qoruv Ukraina-Türkiye komissiyasını qurmağa teklif etken edi.
Sentâbrniñ 2-nde Birleşken Milletler, Baş kâtibi António Guterresniñ Qırım ve Aqyarda insan aqlarınıñ bozuluvına dair yañı maruzasını aydınlattı. Vesiqada qayd etilgenine köre, BM Baş kâtibiniñ maruzası 2020 senesi iyülniñ 1-nden 2021 senesi iyünniñ 30-na qadar müddetni qavrap ala ve «insan aqları ve halqara gumanitar uquq bozuluvlarını tarif ete».
