Qıtay Halq Cumhuriyetiniñ milliy sağlıq komissiyasınıñ bildirgenine köre, soñki kün devamında koronavirustan ölgenlerniñ sayısı 150 oldı. Qıtay ekimleriniñ aytqanına köre, 149 ölüm Hubey vilâyetinde, bir ölüm Haynan adasında qayd etildi. Umumen qırğınlıq devamında memlekette 49824 hasta qayd etildi, dep haber ete «Nastoyaşçeye Vremâ».
Esas Qıtayda 409 yañı hasta qayd etildi, keçken künge köre daa az. Tedaviylengenlerniñ umumiy sayısı 24000-den çoq oldı.
Qıtaynıñ dört vilâyeti – Yünnan ve Guyçjou (eñ yüksek birinci seviyeden üçüncige) ve Guandun ve Şansi (birinciden ekincige) – koronavirusnen hastalanmaq telükesi eksilgenini bildirdi, dep haber ete Reuters yerli tibbiyet akimiyetiniñ malümatına esaslanıp.
Daa evel telüke seviyesi eksilgenini Gansu ve Lâonin vilâyetleriniñ tibbiy akimiyetleri bildirgen edi.
İtaliyada ise Qıtaynıñ Uhan şeerinden tarqalğan yañı koronavirus yuqunçından üçünci kişi öldi, dep bildire Corriere della Sera. Gazetanıñ malümatına köre, şimaliy İtaliyanıñ Krema şeerinde esli-başlı qadın vefat etti. Daa evel İtaliyada koronavirustan ölgen eki kişi aqqında haber etilgen edi: hastalıqnıñ ilk qurbanları Lombardiya ve Venetsiyada yaşağan esli-başlı erkek ve qadın oldı.
SCMP malümatına köre, umumen yañı hastalıqtan dünyada 2468 insan can berdi.
