Qırımtatarlar eyyeti Qırım musulmanları diniy idaresinden dört musulmannıñ tutuluvına cevap bermege talap etti. Bu aqta «Qırım birdemligi» areketi haber ete.
Aqmescitte qırımtatar eyyeti dört qırımtatar qadını – Esma Nimetulayeva, Nasibe Saidova, Elviza Aliyeva ve Fevziye Osmanovanıñ tutuluvına cevap bermege talap ete.
Faallerden biri aytqanına köre, toplaşqan qırımtatarlar QMDİ «musulmanlarnıñ namusını qorumaq içün musulman borcunı yerine ketirsin» dep istey.
Oktâbrniñ 15-nde tutulğan qadınlar Qırımda «Hizb ut-Tahrir» islâm siyasiy firqasınıñ faaliyetinde iştirak etkeninde ve teşkil etkeninde qabaatlana.
Bugün tutulğanlarnıñ sıñırlav tedbiri belgilenecek. Qayd etilgenine köre, bu dava Qırımda «Hizb ut-Tahrir» ile alâqalarınen bağlı qadınlarğa qarşı ilk dava olıd.
Esma Nimetulayeva – konditer, çağına yetmegen beş qıznıñ anası, Bağçasarayda yaşay. O – 2023 senesi «Hizb ut-Tahrir» davası boyunca apiske alınğan siyasiy mabüs Remzi Nimetulayevniñ ömür arqadaşı.
Elviza Aliyeva Bağçasaray rayonınıñ Topçıköy (Dolinnoye) köyünde yaşay. Aqmescitteki fırında kassir olıp çalıştı, Qırım federal universitetinde «Menecment» bölüginiñ dördünci kursında oquy.
Nasibe Saidova – Qırımda belli imamnıñ qızı, kollecniñ ocalıq bölüginiñ soñki kursını bitire ve Zalanköy (Holmovka, Bağçasaray rayonı) köyünde bala bağçasında çalışa.
Fevziye Osmanova Aqyar rayonınıñ Mamaşay (Orlovka) köyünde yaşay ve tükânda çalışa. Esma Nimetulayevadan ğayrı, bütün dava mabüsleri 22 yaşında bile degil.
Rusiyeli aq qorçalayıcı Nikolay Polozov Qırım rusiyeliler tarafından repressiyalarnı işletmek içün bir poligon olaraq qullanıla, soñra bu repressiyalar Rusiyede arta.
«Qırımda tintüv ve apiske aluv haberleri artıq kimseni şaşırmaydır. Qorantalar apiske alına edi – baba ve oğul, ağa-qardaşlar ve ilâhre. Ne de olsa, cezalayıcılarnıñ degradatsiyası toqtamay, ve olar gruppa davalarını uydura, bu repressiyalarnıñ qurbanları qadınlar ola», – dep ayttı o.
Onıñ aytqanına köre, yerli uquq qoruyıcılar Moskva yolbaşçılarına özüni begendirmek içün qanunsızlıq ve cezasızlıqtan faydalana.
