Qırımtatarlar Bekirovnıñ serbestligi içün dua etti (süret toplamı)

Dekabr 21-de Novooleksiyivka qasabasınıñ camisinde Qırımda tevfiq etilge qırımtatar faali Edem Bekirov aqqında hatırlattılar. Onıñ yaqın vaqıtta azat etilmesi içün semetdeşleri dua etti ve Edem Bekirovnıñ azat etilmesine yardımcı olmaq ricasınen Ukraina akimiyeti ve dünya topluluğına muracaat imzaladılar.

Bundan gayrı qırımtatar cemiyeti, Rusiye prezidenti Vladimir Putinnen faalniñ boşatılmasını müzakere etmek ricasınen Türkiye prezidenti Recep Erdoğanğa muracaat ettiler.

Herson vilâyetindeki Novooleksiyivka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.

Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.

Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene.