Fevralniñ 21-nde qayd etilgen Halqara ana tili kününde Nefes qırımtatar teşebbüsi qırımtatar tilinden üçünci online diktant keçirdi. Teşkilâtçılar, keçirilgen imlânıñ maqsadı – ana tili kününde qırımtatar halqınıñ birleşmesidir, dep ayta.
2021 senesi imlâ iştirakçileri şaire ve oca Emine Useinniñ «Üç ceviz» eseriniñ parçasını yazdı. Diktant metnini «Fidançıq» inkişaf merkeziniñ ocası Zemine Kurtmemetova oqudı.
Yanvarniñ 27-nde Ukrainanıñ vaqtınca işğal etilgen topraqlarınıñ reintegratsiya meseleleri nazirligi «cemaatçılıq ile elektron mesleatlar» içün qırımtatar tiliniñ inkişafı ve populârlaştıruvınıñ kontseptsiya leyhasını derc etti.
Ukraina reintegratsiya nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etti. Nazirlik Duolingo şirketine – çetel tillerini ögrenüv platformasına muracaat etip, olarnıñ servisi esasında qırımtatar tili kursını başlatmağa teklif etti.
İşğal altındaki Qırımnıñ Rusiye akimiyeti umumtasil mekteplerde qırımtatar ve ukrain tilleri derslerini azğarğa endirdi. Akimiyetniñ qırımtatarlarnı mekteplerde ana tilini ögrenmek imkânından marum etkeni aqqında Qırımtatar Milliy Meclisiniñ vekilleri de aytqan edi.
Aynı vaqıtta, yarımadada qabul etilgen «Qırım Cumhuriyetiniñ Anayasasınıñ» 10-uncı maddesi qırımtatar, ukrain ve rus tillerine devlet tili statusını bere.
Aqmescitte keçirilgen qırımtatar tiliniñ online diktaktı nasıl keçti, Qırım.Aqiqatnıñ fotoresimlerinde baqıñız.
Facebook Forum