Qırımtatar Milliy Meclisi Rusiyeniñ Ukrayinağa qarşı cenkiniñ bitirilmesi ile bağlı "barışıq planı"na dair öz beyanatnı yayınladı. Meclis reisi Refat Çubarov imzalağan vesiqa 2025 senesi ilk qış ayınıñ 28-de yayınlandı.
Vesiqada qayd etile ki, Ukrayina tamır halqınıñ temsil organı Ukrayina, ABD ve Avropa Birligi memleketleriniñ mustaqil Ukrayin devletiniñ havfsızlığı, suvereniteti ve abadanlaşması içün yapqan ğayretlerini alğışlay.
Mecliste qayd eteler ki, ABD mevamı ile bağlı hususiy şaraitlerden sebep, "barışıq planı" leyhasında adaletli ve turğun barışıqqa irişmek içün yardım etecek maddeler yoq. Qırımtatar halqınıñ vekillerini vesiqa leyhasınıñ metninde Ukrayinanıñ halqara seviyede tanılğan sıñırlarında topraq bütünligini ğayrıdan tiklev vazifesi qayd etilmegeni qasevetlendire.
"Vesiqada Ukrayinanıñ ayırılmaz bir parçası olğan ve Rusiye Federatsiyasınıñ vaqtınca işğali altında bulunğan Qırım MC ve Aqyar toprağı aqqında söz yürsetilmey. Biz, vesiqa leyhasında Ukrayina suvereniteti halqara seviyede tanılğan sıñırlar çerçivesinde bütün territoriyasına tarqalğanını açıq ve bir manada qayd etmek kerek, dep tüşünemiz. Bunıñen beraber, Qırımtatar Milliy Meclisinde añlaylar ki, "barışıq planı"nıñ leyhası Rusiye Federatsiyasını memnün etmeycek, çünki o öz soñki talaplarını devam ettirecek. Ukrayina ve onıñ ortaqları tarafından böyle talaplarnıñ qabul etilmesi Ukrayinanıñ teslim oluvı ve devletler arasındaki munasebetlerni idare etken halqara uquqnıñ esas prinsipleri ve qaideleriniñ ve BMT nizamnamesinde belgilengenlerniñ soñki viran etilüvi demek olur edi", — dep aytıla beyanatta.
Qırımtatar Milliy Meclisi Ukrayina prezidenti Volodımır Zelenskıynı Qırım ile bağlı meseleler boyunca halqara muzakereler vaqtında tamır qırımtatar halqınıñ aqlarına, BMT tamır halqlarnıñ aqları aqqında beyannamesinde qayd etilgen serbest, evelden ve añlı razılıq menfaatına ait olmağan qararlarnıñ qabul etüv esnasında semereli iştirak etüvini temin etmek içün Ukrayina eyyetiniñ terkibine olarnıñ vekâletli temsilcisini kirsetmesine çağıra.
