Ukrayina prezidentiniñ Qırım Muhtar Cumhuriyetindeki Temsilciliginde Rusiye tarafından mahküm etilgen Qırımtatar Milliy Meclisiniñ birinci reis muavini, Qırım.Aqiqat müellifi Nariman Celâlnıñ Ukrayinağa qaytmasını alğışladılar.
"Bu, öz seviyesinde Narimannıñ azat etilüvine faal qoltutqan Ukrayina Prezidentiniñ Qırım Muhtar Cumhuriyetindeki Temsilciligi/Qırım platforması Ofisi, qırımtatar halqı ve umumen Qırım içün müim bir vaqia", — dep aytıla bildirmede.
Mında Ukrayina prezidenti Volodımır Zelenskıyge ve muzakere esnasına ve Celâlnıñ azat etilmesine isse qoşqan er keske minnetdarlıq bildirildi.
2022 senesi sentâbrniñ 21-nde Rusiyeniñ kontroli altında bulunğan Qırım Yuqarı mahkemesi Nariman Celâlnı "Anğarada gaz borusında diversiya davası" boyunca sert rejimli koloniyada 17 yılğa azatlıqtan marum etip, 700 biñ ruble para cezasını ve 1,5 yıl azatlıqtan marum etüv cezasını berdi.
Ondan ğayrı Asan Ahmetovnı 15 yıl sert rejimli koloniyada qalmasına üküm etip, 500 biñ ruble para cezasını ve 1 yıl azatlıq sıñırlavını belgilediler. Onıñ qardaşı Aziz Ahtemov 13 yıl sert rejimli koloniyada qalmasına üküm etildi, 500 biñ ruble para cezası ve 1 yıl azatlıqtan marum etildi.
Oktâbrniñ 2-nde Nariman Celâl ve ağa-qardaş Ahtemovlarnı Aqmescitteki 2-nci SİZO-dan alıp ketip, Rusiye apishanelerine etap ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
