Link açıqlığı

Saatnıñ esas haberi

Qırımtatar faali «Tavrida» yolunı videoğa çıqarğanda ücümge oğrağanını bildirdi


Riza Asanov
Riza Asanov

Qırımtatar faali Riza Asanov «Tavrida» yolunıñ bir qısmını videoğa çıqarğanda kimligi belli olmağan insanlar oña ücüm etti, dep bildirdi.

Onıñ aytqanına köre, çarşenbe künü saba Qarasuvbazar civarında oña «tayaqqa oşağan qara uzun bir şeynen» ücüm etildi. Ücüm etkenlerniñ rus tellâfuzı bar edi.

Asanovnıñ qayd etkenine köre, ücüm neticesinde o, esini coydı, özüne kelgen soñ ise rayon hastahanesine ketti, anda bir çoq ezigi ve miy sarsuvı bar olğanı ayttılar.

Qırım.Aqiqatqa malümat bergen Riza Asanov ücümni «faaliyetinen» bağlağanını qayd etti.

«Qırımda faal sürette qarşılıq köstergen ve malümat bergen 15-20 adam bar. Olarnı yoq et, tınçlıq olacaq. Bes-belli ki, qırımtatarlarnıñ integratsiyasınen bağlı yañı siyaset başladı», – dep qayd etti faal.

Asanov, ücümden evel çıqarğan videonı Facebook saifesinde derc etti.

2018 senesi dekabr ayında qırımlı advokatlar Emil Kurbedinov ve Edem Semedlâyevniñ ofisine ücüm etilgen edi.

İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.

XS
SM
MD
LG