«Usein Bekirov gruppası» ukrain ve qırımtatar caz taqımı, KHAYAT ve Aysel Baliçniñ icrasında «Adalar sahilinde» yırı Ukrainanı fevralniñ 21-nde qayd etilgen Ana tili kününe bağışlanğan halqara online performansta temsil etti. Bu aqta Ukraina Tış işler nazirliginiñ matbuat hızmeti Facebookta bildirdi.
Qayd etilgenine köre, virtual til sergisinde ve online performansta 28 UNESCO aza memleketi iştirak etti. Tedbir UNESCOdaki Bangladeş daimiy temsilciliginiñ teşebbüsinen teşkil etildi.
«Ukraina ukraince ve qırımtatarca taqdim etildi. Eyyetler «Öz. Tamır» kontsertinden Usein Bekirov bendi, KHAYAT ve Aysel Baliçniñ icrasında «Adalar sailinde» yırını eşitecek ve Lesâ Ukrayınkanıñ «Lisova pisnâ» satırlarını oquycaq», – dep aytıla haberde.
Ukraina prezidentiniñ Qırım Muhtar Cumhuriyetindeki temsilciligi Halqara ana tili kününde qırımlılarnıñ aqları bozula, dep hatırlattı.
İşğal altındaki Qırımnıñ Rusiye akimiyeti umumtasil mekteplerde qırımtatar ve ukrain tilleri derslerini azğarğa endirdi. Akimiyetniñ qırımtatarlarnı mekteplerde ana tilini ögrenmek imkânından marum etkeni aqqında Qırımtatar Milliy Meclisiniñ vekilleri de aytqan edi.
Aynı vaqıtta, yarımadada qabul etilgen «Qırım Cumhuriyetiniñ Anayasasınıñ» 10-uncı maddesi qırımtatar, ukrain ve rus tillerine devlet tili statusını bere.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
