Qırımtatar rejissörı, Cannes festivaliniñ "Ayrı bir baqış" yarış programmasınıñ iştirakçisi Nariman Aliyev yañı film – ORTALAN tarihiy dramanıñ çekişlerine azırlana. Bunı ForeFilms haber ete.
ORTALAN filminiñ prodüserleri Vladimir Yatsenko ve Anna Sobolevskaya olacaq.
«Ortalan, Gülsum bitam 1944 senesi sürgün etilgen köyniñ adıdır. Menim içün şahsiy manası bar. Bu belâdan zarar körmegen bir qırımtatar ailesi yoq. Menim vazifem bir kün vatanından yoq olğan bir oğlannıñ ikâyesi ile bir halqnıñ faciasını köstermektir», – dedi Nariman Aliyev.
«Tarihiy dramalarnıñ yapıluvı qıyındır, amma biz Narimannıñ rejissör yanaşmasını ve tekrarlanmaz üslübini yahşı bilemiz. Filmniñ eñ yüksek seviyede yaratmaq ve ikâyeni olğanı kibi köstermek içün er şeyni yapmağa azırmız», – dedi Yatsenko.
Qırımtatar rejissöri Nariman Aliyevniñ «Evge» filmi oktâbrniñ 24-nde «Eñ eyi uzun film» nominatsiyasında «Kinokolo» Ukraina kinokritikleri milliy mukâfatını aldı.
Levha 7-inci Halqara Bosfor film festivaliniñ eñ eyi çetel filmi olaraq tanıldı.
Nariman Aliyevniñ filmi «Oskar» mukâfatınıñ long listine kirdi. Film, Odesa halqara film festivalinde gran-pri qazandı.
Aliyevniñ «Evge» filmi Cannes festivaliniñ «Ayrı bir baqış» yarış programmasınıñ iştirakçisi edi, Bükreşteki halqara kinofestivalinde eñ eyi film mukâfatını qazandı.
Süjetke köre, baş qaraman Mustafanıñ (bu rolni qırımtatar asıllı ukrainalı oyuncı ve rejissör Ahtem Seitablayev – QA) büyük oğlu Ukraina şarqındaki cenkte elâk ola. O, onı vatanda, Rusiye işğal etken Qırımda defin etmege qarar ala. Küçük oğlu ve elâk olğan oğlunıñ naaşınen beraber Mustafa yarımadağa yol ala.
Nariman Aliyev — qırımtatar rejissöri, «Qırım ikâyeleriniñ» (qısqa levha) müellifi. «Sensiz» filmi 66-ncı Berlin kinofestivaliniñ Generation 14+ çerçivesinde taqdim etilgen edi. Aliyev öz işlerinde qırımtatarlarnıñ qoranta munasebetlerini, anane ve turmuşını köstere.
