Qırımtatar resurs merkeziniñ idare yolbaşçısı, Qırımtatar Milliy Meclisiniñ azası Eskender Bariyevniñ bildirgenine köre, «Qırımnıñ işğalden qurtarıluvı – onıñ «printsipial fikri» ola. O, onı «Rusiye topraq bütünligini bozmağa çağırğanından şübheli olğanı içün» qıdıruvğa ilân etken Qırımdaki Rusiye mahkemesiniñ qararını Qırım.Aqiqatqa izaatladı.
«İşğalci mahkemelerniñ bu qararı – menim aq qorçalayıcı ve cemaat faaliyetim içün taqip etilüvimdir. Qırımtatar halqınıñ aqlarını qorçalağanım ve Qırım işğalden qurtarılmalı, topraq bütünligi (Ukraina – QA) ise ğayrıdan tiklenmeli, dep tüşüngenim içün. Rusiye akimiyeti meni halqara qıdıruvğa ilân etip, halqara seviyedeki faaliyetimni sıñırlamağa tırışa. İnsan aqlarını qorçalap, halqara meydançıqlarda sıq-sıq ve çoq iştirak etem. Bizler Qırımnıñ işğalden qurtarıluvı içün halqara areketni ve qırımtatar halqı ile birdemlik faalleştirdik. İşğalci bunı begenmey», – dedi Bariyev.
Aq qorçalayıcı Rusiye mahkemesiniñ bu qararı tanılmasın dep, küreşmege niyetlengenini bildirdi.
«Rusiye Yuqarı mahkemesine, halqara mahkemege ve komitetlerge temyiz şikâyetini bermege planlaştıramız. Vatandaş seviyesinde zorbalıqsız aktsiyalar keçirip, halqara toplulıqqa işğalci akimiyetniñ yapqanlarını añlatacaqmız», – dep qoştı Bariyev.
Qırımtatar resurs merkeziniñ idare yolbaşçısı, Qırımtatar Milliy Meclisiniñ azası Eskender Bariyev işğal etilgen Qırımdaki Rusiye mahkemesi tarafından qıdırıla, dep bildire fevralniñ 13-nde Qırım aq qorçalayıcı gruppası Qırımnıñ Rusiye Yuqarı mahkemesiniñ qararına esaslanıp.
Aq qorçalayıcılarnıñ bildirgenine köre, Qırımda Bariyevge qarşı Rusiye Ceza kodeksiniñ 280.1-inci maddesi 2-nci qısmına istinaden (Kütleviy haber vastalarında Rusiye topraq bütünligini bozmaq çağıruvları) açıldı ve Eskender Bariyevniñ qabaatlı olaraq celp etilüv qararı çıqarıldı.
Olarnıñ malümatına köre, 2018 senesi dekabrniñ 24-nde Kreml kontrolindeki Aqmescit Kiyev rayon mahkemesi, Bariyevni Rusiyege ketirilgen ya da Rusiyede yaqalanğan kününden başlap 2 ayğa nezaret altına almağa qarar berdi.
2018 senesi dekabr ayında Eskender Bariyev, işğal altındaki Qırımda yaşağan soy-sopları Rusiye FSBsi hadimleri tarafından sorğuğa çağırıldı, dep bildirgen edi.
Aq qorçalayıcılarnıñ malümatına köre, 60-tan ziyade Ukraina vatandaşı Rusiye ve işğal altındaki Qırımda siyasiy sebeplerden azatlıqtan marum etilgen edi. Ukraina Tış işler nazirligi Rusiyege 300 kere narazılıq bildirip, anda tutulğan ukrainalılarnıñ azat etilmesini talap etti.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
