Aman-aman bütün taraflardan dağlarnen qorulğan sessiz Ay-Serez köyü (şimdi Mejdureçye – QA) Qırım dağları Baş sırasınıñ cenübiy-şarqiy caplarında Ay-Serez özeni boyunca kete. Oña eñ yaqın Sudaq şeerine 22 kilometr bar.
Köy resmiy şekilde (ceneviz menbalarında) ilk sefer XIV asırda añıla. Ülkeşınaslar Ay-Serezniñ daa qadimiy zamanlarğa ait olğanından emin, çünki bir vaqıtları atiqiyatçılar bu civarlarda erte rum devrine ait artefaktlarnı tapqan edi. Orta asırlarda köyde hristianlar yaşağanına dair malümat bar, daa soñra hristianlar yerine müminler keldi. Ay-Serezde olğan eki eski caminiñ yıqıntıları bunı isbatlay. Rusiye imperiyasınıñ vesiqalarında Ay-Serez «qazna tatar» köyü olaraq qayd etilgen edi.
Ay-Serez adını tarihiy toponimika ve tilşınaslıq mütehassısları farqlı şekilde añlata. Bazıları yunan tamırları aqqında ayta. Başqaları ise türk sözünden kelgenini israr ete, manası «Ay ışığı» ola.
Al-azırda yedi soqaqlı ve bir aralıqlı Ay-Serez köyünde beş yüzden çoq sakin yaşay.
Qırım.Aqiqat mühbiri Ay-Serezge barıp, köyniñ sessiz yaşayışını fotoresimlerge çıqardı.
Facebook Forum