Rusiye quvetçileri Qırımnıñ Canköy rayonında "İyegova şaatları" diniy teşkilâtınıñ vekillerini yaqaladı, dep bildire Quralaynıñ 12-nde Qırım ve Aqyar boyunca Rusiye Tahqiqat komitetiniñ idaresiniñ matbuat hızmeti.
Dört adam toplaşuvlarnı video vastasınen keçirgeni haber etile. Tintüvler vaqtında olardan diniy edebiyat tutıp alınğan
"Canköy sakinleri, "İyegova şaatları" rayon bölüginiñ idare organınıñ terkibine kirgenler, onıñ faal faaliyetini devam ettirdiler. Canköy şeeriniñ taqiqat bölügi erkekler video konferentsiya bağı vastasınen toplaşuvlar keçirip, yasaq etilgen diniy teşkilâtnıñ ğayelerini teşviq etmege devam etkenini ve ekstremist malümatnı ögrengenini qayd etti. Bundan da ğayrı, olar yañı tarafdarlarnı celp etip, teşkilât içün para toplap, dağıta ediler", — dep aytıla Taqiqat komitetiniñ haberinde.
Tutulğan erkeklerniñ adları bildirilmey, olarnıñ açıq izaatları da yoq.
Rusiye Yuqarı mahkemesi "Rusiyede İyegova şaatlarınıñ idare merkezi"ni ekstremistik teşkilât olaraq tanıp, onıñ faaliyetini Rusiyede 2017 senesi yasaq etti
"İyegova şaatları" Avropa assotsiatsiyasınıñ malümatına köre, soñki 7 yıl içinde Qırımda 35 din adamı diniy sebeplerden taqip etildi.
"Krım SOS" aq qoruyıcı teşkilâtınıñ talilcisi Yevğen Yaroşenko qayd ete ki, 2022 senesiniñ malümatına köre, Qırımda siyasiy sebeplerden yapılğan cinaiy taqiplerniñ qurbanları arasında tahminen er sekizinci kişi - "İyegova şaatları", umumen 19 kişi.