Ukraina, Qırımnı işğalden qurtaruv küreşi içün daa bir meydançıq olaraq Türk Şurasını qullanmağa tırışa. Bu aqta Ukraina Tış işler naziriniñ birinci muavini Emine Ceppar Azatlıq Radiosına bildirdi.
«Türk Şurasında közetici statusını almağa isteymiz. Türk tilli memleketler kirgen halqara teşkilât… Bizim fikirimizce, Qırım ve qırımtatarlar ve halqnıñ bugün, işğalden soñ rastkelgen aqibetleri mevzusını kötere bilecegimiz bir meydançıq ola bile», – dedi o.
Ukraina akimiyetiniñ planlarında – Qırım meseleleri boyunca telükesizlik konferentsiyası, Kyivde Qırım sammitiniñ teşkil etilüvi ve ilâhre.
«Şimdi elçilernen kerçekleştirgen bütün körüşüvlerimizde ğayelerimizni yavaş-yavaş aytam. Bu qaramalar Ukraina prezidentine artıq resmiy şekilde berildi. Şimdi bu platformanı işletüv imkânını bekleymiz. Bir sıra mesleat, ortaqlarımıznıñ dave ve bu platformanı belli teşebbüslerge resmiyleştirmek içün tedbirler olacaq», – dep qoştı Tış işler naziriniñ birinci muavini.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
