Sentâbrniñ ortası haberlerinen quvandırmadı. Ukrainağa qol tutqan qırımlılar, Varşavada OSCE toplaşuvında Rusiye delegatsyası terkibinde Kreml nezaretindeki Qırım teşkilâtları ve matbuatınıñ vekilleri olğanına pek açuvlandı.
Olarnıñ Varşavada bulunğanı - ukrainacı qırımlılar içün betlerine tükürik kibidir. Ve bu, Rusiye, faallerni, qırımtatar Milliy Meclisiniñ Eskender Bariyev kibi azalarını halqara qıdıruvğa ilân etken, #LiberateCrimea cemiyet areketiniñ koordinatorı Oliver Loode kibi halqara uquq qoruyıcılarğa ve jurnalistlerge kirişni yasaq etken vaqtında olıp keçken şeylerdir. Ne içün kollaborantlar, Ukrainağa dost olğan memleketke serbest kirgeninden ğayrı, anda daa çıqışta da buluna? Bundan ağırta.
Kremlde bir mesele çıqtı: qomşu Rusiyeniñ bölgelerinde olğan aqıllı top idarecilerden kimse sanktsiyalı Qırımğa kelmege istemey
Ruslan Balbekniñ etrafından maña meraqlı bir malümat keldi: Kreml Sergey Aksönovnıñ salâhiyetini kestirmege istegeni belli oldı. Oña Qırımnıñ rusiyeli başı vazifesini qaldırırlar, Qıımnıñ rusiyeli ükümetiniñ reisi ise başqa adam olacaq. Amma bir mesele çıqtı: qomşu Rusiyeniñ bölgelerinde olğan aqıllı top idarecilerden kimse sanktsiyalı Qırımğa kelmege istemey. Aksönov boşanğan yerde öz müavinlerinden birisini keçirmege istey, amma Moskova buña qol tutmay. İşte bu yerde Rsulan Balbek öz adamını lobbi etip başladı.
Laf, Qırımda akimiyetniñ bütün basamaqlarından keçken, adamlar arasında itibarı olğan idareci aqqında yürsetile. Bu Albert Kangiyev - namuslı memurlardan birisi. O, sovhoz müdiri edi, Qarasuvbazar rayon devlet memuriyetiniñ başı edi, sanayı siyaseti, naqliyat, QMC-niñ alâqa ve yaqıt-energetika kompleksiniñ naziri edi, Qarasuvbazar meri. Bu vaqıtta o, öz biznesini tiklemedi, qazançlı yerlerge soylarını yerleştirmedi, qabarcılıqtan aqça toplamadı. Şübesiz, qabarcılıq qavğalarında batqan "ğalipler taqımı"nıñ yanında bu - onıñ büyük plüsidir.
Körünip tura ki, Kangiyev, "referendum"nı qabul etmegenine baqmadan, Ruslan Balbek reberlik etken rusiyeperest qırımtatar reberlikniñ köz nazarından çıqmadı. Olar, onıñ ihtisasiy çizgilerni ve itibarını yahşı bile. Böyle adam olarnıñ taqımını bayağı quvetleştirir edi. Soñra olar aynecilik yaptı. Başta onı "İnkişaf sanayısı" qurucılıq teşkilâtınıñ baş müdiriniñ müavini vazifesine davet ettiler. Ve Qırımda yerli şuralar saylavlarınıñ ögünde Kangiyev, Balbekniñ taqımına kirdi.
Kangiyev tayin etilse, kremlge birden bir qaç fayda olacaq - mına sizge (halqara toplulığına ve qırımtatarlarğa) bölge reberi - tamır halqnıñ vekili, bizge ise - büdjetni qabarcılıq shemalarınen boşatıp oturmaycaq namuslı idareci.
Amma, kene şu menbadan alınğan malümatqa köre, "ğalipler taqımı"nıñ çoqusı Kangiyevniñ nazmetine qarşı çıqa. Olar, soñki beş yıl içinde uydurılğan ve tertiplengen "qara shemalar"nıñ dağılmasından ve Balbek itibarınıñ artqanından qorqa. Ne ise, Kangiyevniñ şansı bar, amma küçük.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün