İnsan aqları vekâletlisi Lüdmila Denisovanıñ bildirgenine köre, Bağçasaraydaki birinci «Hizb ut-Tahrir davası» boyunca qabaatlanğan Zevri Abseitov ve Rustem Abiltarovğa Rusiyeniñ Stavropol ülkesindeki koloniyada tibbiy yardım kösterilmey.
«Zevri Abseitovnıñ tiş ve büyrek problemleri bar, II derece gipertoniya, onı tibbiy ceetten kontrol etmeseler, insult ola bile. Rustem Abiltarovnıñ sürekli hastalıqları bar – piyelonefrit ve revmatoid artrit. Bundan ğayrı, miokard mikroinfarktı oldı», – dep yazdı Denisova Facebookta.
Ukraina ombudsmeni, tibbiy tedqiq yapılması ve kerekli yardım kösterilmesi içün Rusiye İnsan aqları vekâletlisi Tatyana Moskalkovağa muracaat etti, dep bildirdi.
2018 senesi dekabr ayında Şimaliy Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada, Ruslan Abiltarov, Remzi Memetov ve Zevri Abseitovnı 9 yıl sert rejimli koloniyada qalmalarına üküm etti.
Mabüslerden iç birisi qabaatını tanımadı. Olar cinaiy davalarınıñ «siyasiy sebepleri» bar, dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutov 16 yıl ve 9 ayğa, Remzi Memetov, Rustem Abiltarov, Zevri Abseitov 8 yıl ve 9 ayğa apiske alındı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
