O, beş buçuq yıl içinde ilk sefer aqayını uzun müddetli körüşüvde kördi. Şeyhaliyev şimdi Rusiyeniñ Krasnoyarsk vilâyetindeki Yeniseysk apishanesinde buluna.
"Aqayım pek azdı. <...> pek şiddetli varikoz damarları, ayağı bazı yerlerde mavı. Umumen alğanda, vaziyeti qanaatlendiricidir", — dep qayd etti qırımlınıñ qadını. O şunı da bildirdi ki, Şeyhaliyevniñ müessise memuriyeti ile problemleri yoq.
Qırımlı bu sene aprelniñ soñunda Rusiye Federatsiyasınıñ Krasnoyarsk vilâyetine etap etildi. Şimdi o tuvğan Qırımdan 6 biñ kilometr uzaqlıqta buluna.
«Hizb-ut-Tahrir»niñ başqa işleri üzerinde çalışqan advokat Emil Kurbedinovnıñ aytqanına köre, Qırımlı siyasiy mabuslerniñ evlerinden uzaqta bulunması olarnıñ aile bağlarını saqlamaq aqlarını boza. Suriye Şeyhaliyeva qayd etti ki, yol «em fizikiy, em de ruhiy ceetten ağır» ve 10 kün devam etti. Lâkin vatandaşları oña yol masraflarında yardım ete ediler.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
