Sentâbrniñ 21-nde Rostov vilâyetindeki Rusiye yaşav tarzı koloniyasından azatlıqqa çıqqan qırımlı cemaat jurnalisti Nariman Memedeminov Qırımğa qaytqan soñ qırımtatarlarnıñ mahkemelerini aydınlatmağa devam etecegini inkâr etmey. Bu aqta o, Qırım.Aqiqat Radiosınıñ yayınında ayttı.
«Özümni cemaat jurnalisti dep saymağa devam etem. Jurnalist faaliyetimnen oğraşmağa imkânım olurmı – Qırımğa kelgen soñ añlaycam. Ne qadar faydalı, ne qadar kerek. Bilem, ne yazıq ki, apis cezaları ve sahte cinaiy davalar – siyasiy sebepli – devam ete, bu tek bizim fikrimiz degil, dünya toplulığı qıymet kesti», – dep qayd etti Memedeminov.
Qırımlı advokat Edem Semedlâyevniñ qayd etkenine köre, Rusiye mahkemesiniñ ükmüne köre, Nariman Memedeminovğa azatlıqqa çıqqan soñ açıq faaliyetnen oğraşmaq yasaq degil. Ne de olsa, imayeciniñ aytqanına köre, uquqçılar Avropa insan aqları mahkemesine şikâyet azırlay.
«Ebet, qabaatlav aslında onıñ jurnalist faaliyetinen bağlı edi… Avropa insan aqları mahkemesine şikâyet bermege niyetlenemiz. Ortaqlarımız onı endi azırlaylar», – dedi Semedlâyev.
2019 senesi oktâbr ayında Rusiye mahkemesi Nariman Memedeminovnı «İnternet ağı vastasınen terror faaliyetini kerçekleştirmege açıq şekilde çağırğanında» qabaatlap, eki buçuq yıl yaşav tarzı koloniyasında qalmasına üküm etti. Mabüs qabaatını tanımadı.
Moskva vilâyetindeki Vlasiha Arbiy istinaf mahkemesi mayısnıñ 14-nde ükümni deñiştirmedi. Ukraina Tış işler nazirligi narazılıq bildirdi.
Nariman Memedeminov Rostov vilâyetindeki yaşav tarzı koloniyasında bütün apis cezasını çekti. «Memorial» Rusiye aq qorçalayıcı merkezi 2018 senesi onı siyasiy mabüs dep tanıdı.
Apiske alınmazdan evel Memedeminov bir sıra Ukraina kütleviy haber vastaları, hususan Qırım.Aqiqatnen işbirligi yaptı. 2019 senesi noyabr ayında Ukraina jurnalistleri milliy birligi Qırımda taqip etilgen qırımtatar cemaat jurnalistleri, şu cümleden Memedeminovnı, İgor Lubçenko söz serbestligini qoruv milliy mukâfatınıñ kollektiv laureatı olaraq tanıdı.
