Saban ayınıñ 11-de Aqmescit şeeriniñ Kiyev rayon mahkemesi mabüs Amethan Abdulvapovnıñ apiske alınuv cezasını keçirgen soñ Rusiyeniñ İrkutsk vilâyetine avuştırılması qanunsız dep ilân etilgeni aqqındaki iddasını red etti, dep haber ete "Qırım birdemligi" advokat Nazim Şeyhmambetonıñ sözlerine atıf etip.
İmayeci qayd etti ki, Abdulvapov öz talaplarını Angarsk cezahanesi doğğan Qırımından 5500 kilometrden ziyade uzaqlıqta yerleşkenini misal ketirip añlatqan. Bu "oña ve onıñ qorantasına qısqa ve uzun müddetli ziyaretler aqqını qullanmaqnı semereli şekilde imkânsız ete", — dedi Şeyhmambetov.
Siyasiy mabüsniñ ana-babası nefaqacılar, maddiy qıtlıq ya da sağlıq vaziyeti sebebinden oğlunı ziyaret etip olamaylar. Qırımtatarnıñ ömür arqadaşı da çağına yetmegen balaları ile bu qadar uzaq mesafeni keçip olamay ve yılda eñ azından bir kere yolculıqqa büyük para ayıra.
"Bu, Abdulvapovnıñ halqara, milliy qanunlar ve RF-nıñ cinaiy-icraiy kodeksinen kefil etilgen aile bağlarını qorçalav aqqınıñ bozuluvına ketire", — dep qayd etti Şeyhmambetov.
Amethan Abdulvapov video konferentsiya bağı vastasınen oturışuvda iştirak etmedi. Mahkeme onı temin etmege imkânsız olğanını bildirdi. Nazim Şeyhmambetovnıñ qayd etkenine köre, bu bozuvdır, çünki onıñ imayesi altında bulunğan şahısnıñ "memuriy mahkeme esnasında temin etilgen ve amelge keçirilmegen delillerni taqdim etmek, red etmek ya da itiraz etmek aqqı bar".
Kiyev rayon mahkemesi, siyasiy mabüsniñ bulunmaması sebebinden imayeciniñ delillerini diñlep, davanı red etti. O, Rusiye Federatsiyası Ceza kodeksiniñ 205.5 maddesine istinaden mahküm etilgen şahıslar evden uzaq bir müessisege avuştırılğanlarına şikâyet etmek aqqından marum olğanlarını bildirdi. O, mahkeme qararı alınğan soñ şikâyet etilecek, dep qoştı.
Amethan Abdulvapov 2022 senesi kiçik ayda tintüvlernden soñ tutuldı. O vaqıt Qırımnıñ bir qaç rayonında Rusiye quvetçileri dört insannı yaqaladı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlarnıñ episi Rusiyede terroristik olaraq tanılğan, lâkin dünyanıñ bir çoq memleketiniñ milliy qanunları seviyesinde sıñırlanmağan "Hizb ut-Tahrir" islâm siyasiy firqasında iştirak etkeninde qabaatlandı.
2023 senesi saban ayınıñ 15-nde Rusiye mahkemesi Abdulvapovnı 10 yıl ve 6 ayğa azatlıqtan marum etti.