Kremlniñ eski siyasiy mabüsi, ukrainalı faal, qırımlı Volodımır Baluh daa bir ameliyatqa azırlana. Bu aqta daa bir eski siyasiy mabüs, qırımlı Ukraina rejissöri Oleg Sentsov bildirdi.
«Bugün Volodâ Baluhnen laf ettim. Er şey güzel, özüne kele. Künde cayav trenajorında 6 km cayav keçe, ayaqmaşinada – 20. Santıraç oynay. Daa bir ameliyatqa azırlana. Mizahı ve aqlı aynı. Ekinci Ukraina kosmonavtı ve Göllivud oyuncısı arasında kelecek karyerasını saylay», – dep yazdı Sentsov Facebook saifesinde.
Qırımdan köçip kelgen cemaat faali Natalya Lütikova Baluh Kyivdeki acele yardım hastahanesinden çıqarıldı, dep bildirdi.
«Avropa birdemligi» firqası parlament fraktsiyasınıñ reisdeşi İrına Ğeraşçenko Baluhnıñ ekimleri bergen malümatqa esaslanıp, qırımlı siñir cerrahlığı bölüginde yata, dep bildirdi.
Baluhnıñ köteklengeni sentâbrniñ 8-nde saba belli oldı. Kyiv politsiyası bunı aydutlıq dep tasnif etti. Politsiya malümatına köre, Baluh sentâbrniñ 7-nde 10-15 kişinen Gidroparktaki müessiselerden birinde raatlandı. Sentâbrniñ 18-nde politsiya şübhelini tuttı, sentâbrniñ 19-nda mahkeme onı apiske aldı.
Sentâbrniñ 7-nde Baluh, Oleg Sentsov ve 33 diger ukrainalı, hususan siyasiy mabüslerniñ, Rusiye apsinden azat etilüvine bir yıl toldı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
