Aprelniñ 14-nde Kreml kontrolindeki Qırım Yuqarı mahkemesinde Qırımda ğıyabiy şekilde mahkeme etilgen Qırımtatar Milliy Meclisiniñ reisi Refat Çubarovnıñ davası boyunca imaye tarafınıñ şaatları ve zarar körgen daa bir kişi sorğuğa çekildi. Bu aqta «Qırım birdemligi» cemaat birleşmesi advokat Aleksandr Osokinniñ malümatına esaslanıp bildire.
Şaat Edem Dudakov – Qırım Muhtar Cumhuriyeti milletlerara munasebetler ve sürgün etilgen vatandaşlar işleri komitetiniñ sabıq yolbaşçısı – qırımtatarlar istegenini mitingde barışıq yolunen bildirecek edi, dep ayttı. O, uquq qoruyıcı organları hadimleriniñ işi teşkil etilmegen edi, dep qayd etti.
«O qadar insanğa pek az hadim bar edi. Böyle bir şey ilk sefer körem, qalqanları yoq edi», – dedi Edem Dudakov.
Advokat Emine Avamilevanıñ 2014 senesi fevralniñ 26-nda olğan mitingnen bağlı şaatlığına köre, Qırımtatar Milliy Meclisi tedbir keçirilecegini Aqmescit şeeriniñ memuriyetine evelden haber etken edi.
«Biz çatışma olmasın dep, ayat yapacaq edik, Meclis Prezidiumınıñ azası olaraq menim böyle maqsadım bar edi. Mikrofon maña berilgende men evlerge ketmege çağırdım», – dep tarif etti Emine Avamileva.
«Çubarov davasında» zarar körgen kişi olaraq qayd etilgen ve miting vaqtında yaralanğan Konstantin Dovgonçuk mahkemede Refat Çubarovnıñ qabaatlı olğanını tüşünmey ve oña qarşı bir iddiası yoq, dep bildirdi. Bundan ğayrı, Dovgonçuk bergen şaatlıqta Refat Çubarovnıñ qalabalıqlarnı teşkil etkenini isbatlaycaq bir şey yoq.
Refat Çubarovnıñ advokatı Aleksandr Osokinniñ aytqanına köre, imaye tarafı mahkemege ve esnas taraflarına davanıñ alternativ tarafını köstere.
«2014 senesi fevralniñ 26-nda Devlet şurası ögünde olğan ezüvni qırımtatarlar teşkil etmedi», – dep ayta advokat.
Dava baqıluvı aprelniñ 16-nda belgilendi.
Qırımtatar Milliy Meclisiniñ reisi Refat Çubarovnıñ açıq izaatları yoq.
Hatırlatamız, aprelniñ 12-nde Kreml kontrolindeki Qırım Yuqarı mahkemesiniñ oturışuvında zarar körgenlerden biri Refat Çubarovnı tanımay, dep ayttı.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.
Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.
Çubarovnıñ qayd etkenine köre, Rusiye akimiyeti «qırımtatar halqına qarşı daa bir repressiya dalğasını başlattı».
Advokat Nikolay Polozov Rusiye tahqiqatçısınıñ onı işğal altındaki Qırımda Çubarovğa qarşı kene açılğan davada imayeden çetleştirmek niyeti aqqında bildirdi.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
