Aqmescitniñ Kiyev rayon mahkemesi dekabrniñ 5-nde Bağçasaraydaki «Hizb ut-Tahrir davasınıñ» mabüsleri Server Mustafayev ve Edem Smailovnıñ nezaret altında tutuv müddetlerini eki ayğa uzattı. Olar 2019 senesi fevralniñ 9-na qadar nezaret altında qalacaq.
Bu aqta Mustafayevniñ belgilengen advokatı Sergey Bakayev Qırım.Aqiqat mühbirine bildirdi.
«İmayeniñ sıñırlav usulını deñiştirmek içün delilleri mahkeme tarafından diñlendi, amma nezaret altında tutuv müddetini uzatmaq qararı qabul etildi. Bu qararnı şikâyet etmek ve sıñırlav usulını deñiştirmek içün tedbir alacaqmız», – dep tarif etti advokat.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
