Rusiye kontrolindeki Aqmescitniñ Kiyev rayon mahkemesi aprelniñ 29-nda keçirilgen qapalı oturışuvında Bağçasaraydaki üçünci «Hizb ut-Tahrir davası» mabüsleriniñ sıñırlav tedbirini uzattı. Bu aqta advokat Edem Semedlâyev «Qırım birdemligi» birleşmesine bildirdi.
«Tahqiqatçı, insanlar ağır bir maddege istinaden qabaatlana, tahqiqattan saqlana, şaatlarğa tesir ete ve delillerni yoq ete bile dep, sıñırlav tedbirini üç ayğa uzatmağa rica etti. Faqat faktik bir delil bermedi. Tek tahminlerini ayttı», – dep bildirdi Semedlâyev.
Onıñ aytqanına köre, advokatlar dördünci Jeneva Şartnamesine, BM Baş Assambleyası qararlarına esaslanıp, tahqiqatçınıñ muracaatına qarşı çıqtı. İmaye tarafı mabüslerniñ müsbet hasiyetnamelerini de berdi, amma mahkeme advokatlarnıñ malümatına emiyet bermedi.
Mahkeme tahqiqatçınıñ muracaatını qabul etip, mabüslerniñ sıñırlav tedbirini üç ayğa – 2020 senesi avgustnıñ 9-na qadar – uzatmağa qarar aldı.
Semedlâyevniñ qayd etkenine köre, bu mahkeme oturışuvında bütün mabüsler «sessiz narazılıq kösterdi, çünki bu muracaatnıñ neticesi belli olğanını añlay ediler».
Martnıñ 11-nde saba Rusiye quvetçileri Bağçasarayda ve Bağçasaray rayonında dört qırımtatarını tuttı. FSB, tutulğan şahıslarnı qomşu Rusiyede terror teşkilâtı olaraq tanılğan «Hizb ut-Tahrirde» iştirak etkeninden şübheli dep saya. «Memorial» Rusiye aq qorçalayıcı merkezi bu davada qabaatlanğanlarnı siyasiy mabüs olaraq tanıy.
Ukraina Tış işler nazirligi, FSBniñ Qırımda bu yapqanlarına qarşı narazılıq bildirdi. Müessise spikeri Yekaterina Zelenkonıñ qayd etkenine köre, Rusiye «dünya toplulığınıñ qırımtatarlarğa qarşı basqı toqtatmaq çağıruvlarını… bütün halqara, ükümetlerara institutlarnıñ qararlarını körmemezlikke ura». Qırım Muhtar Cumhuriyetiniñ Prokuraturası martnıñ 11-nde qırımtatarlarnıñ tutulmasınen bağlı cinaiy dava açtı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
