Bazarertesi künü, sentâbrniñ 28-nde, Rusiye kontrolindeki Aqmescitniñ Kiyev rayon mahkemesi advokat Aleksey Ladinniñ tahqiqatçınıñ cemaat jurnalisti Ayder Kadırovğa qarşı areketlerinen bağlı şikâyetini baqtı. Mahkeme onı qanaatlendirmeyip, «tahqiqatçınıñ areketlerinde bozuv yoq», dedi.
Bu aqta Ladin «Qırım birdemligi» cemaat birleşmesine haber etti.
Ladinniñ bildirgenine köre, birinciden, o, oña ve müvekkiline tilşınaslıq-psihologik dinşınaslıq ekspertizasını keçirmek qararınen ve onıñ neticelerinen tanış olmağa bermegenleri içün şikâyet arizasını yazdı. Ekinci sebep – tahqiqatçı advokatqa vesiqalarnıñ kopiyalarını yapmağa bermedi ve dava malümatlarını aydınlatmama vesiqasını tutıp almağa tırıştı.
Berilgen malümatqa köre, neticede Ladin ve Kadırov ekspertiza malümatınen tanış oldı, tahqiqatçı mahkemede advokatnıñ dava malümatını öz tehnikasına kopiyalamasına qarşı olmağanını bildirdi. Advokat mahkemeniñ bu qararına qarşı da istinaf şikâyetini bermege planlaştıra.
Avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
