Kreml kontrolindeki Aqmescitniñ Kiyev rayon mahkemesi iyülniñ 19-nda 2018 senesi dekabr ayında advokatlar Emil Kurbedinov ve Edem Semedlâyevniñ ofisine yapılğan ücüm sebebinden Rusiye tahqiqatçısınıñ areketsizliginen bağlı şikâyet arizasını qanaatlendirmedi.
Bu aqta Semedlâyev Qırım.Aqiqatqa tarif etti.
«Oturışuv pek tez bitti. Tahqiqatçınıñ cinaiy davanı açmağa razı olmağanını şikâyet ettik. Tahqiqatçınıñ areketlerini qanunsız tanılmasını ve lâğu etilmesini istedik. Faqat şikâyet arizamıznı körgen tahqiqatçılar bunı özleri yaptı ve tahqiqatnı devam ettirdi. Şu sebepten mahkemeniñ şikâyet arizamıznı qanaatlendirecek sebep yoq edi», – dedi Semedlâyev.
Semedlâyevniñ fikirince, Rusiye tahqiqatçısı «belli bir tedbirler yapıp, ileride cinaiy iş açmaqtan kene vazgeçer».
Aqmescitte 2018 senesi dekabrniñ 9-nda kimligi belli olmağan kişi qırımlı advokatlar Emil Kurbedinov ve Edem Semedlâyevniñ ofis penceresini qırdı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
