Martnıñ 27-nde Qırımda keçirilgen kütleviy tintüvler vaqtında tutulğan Servet Gaziyevniñ sağlıq vaziyeti fenalaştı. O, Rostov-na-Donu SİZOsında buluna, oña tibbiy yardım kösterilmey, dep bildirdi advokat Aleksandr Stasük Qırım.Aqiqat mühbirine.
«Rostov SİZOsında tutulğan müddet içinde Servet Gaziyevniñ sağlıq vaziyeti ket-kete fenalaşa. Aytqanına köre, qursağı toqtamayıp ağıra, yüregi «acıta». Oña tek ağrı kesici ilâclar bereler. SİZO reberligine eki kere muracaat etip, tibbiy teşkerüv keçirmege, yardım köstermege rica etti – cevap yoq. Teşkerüv keçirilmey, yardım kösterilmey. Şu sebepten Cezalarnı yerine ketirüv federal hızmeti, tibbiy bölük ve Rostov vilâyetiniñ insan aqları vekâletlisine muracaat etip, acele tibbiy teşkerüv keçirilmesini ve acele yardım kösterilmesini rica ettim. Gaziyevniñ aşqazanı sürekli ağıra, şu sebepten kösterilecek yardımnı añlamaq içün teşkerüv yapılmalı», – dep ayttı advokat.
Haber derc etilgende Rostov vilâyetindeki Cezalarnı yerine ketirüv federal hızmeti idaresiniñ izaatları yoq edi.
