Ukrainañ Viyanadaki halqara teşkilâtlar vekili Yevğen Tsımbalük OSCE Daimiy şurasınıñ cumaaqşamı künü olğan toplaşuvında Qırımda yaşağan insanlarğa halqara destek kerek, dep qayd etti. Onıñ çıqışı Ukraina Tış işler nazirliginiñ saytında derc etildi. Ukraina temsilcisi «Qırımda aqlarnıñ bozuluvı devam ete», dep qayd etti.
«Vaqtınca işğal etilgen Qırımda insan aqları vaziyeti zor qala, insanlar hırsızlana, ğayıp ola, yerli eali qorquşçıla, işkenceler ola ve kütleviy haber vastalarınıñ azatlığı sıñırlana. Yarımadanıñ demografik deñişmeleri ve askeriyleştirilüvi Qırım ilhaqı ıntıluvları aqibetleriniñ yalıñız bir parçasıdır», – dedi Tsımbalük.
Onıñ aytqanına köre, OSCE ve Avropa Şurasınıñ «buhrannı al etmek içün kerekli areket etecek keniş imkânları bar».
«Eyyetimizniñ fikirince, Avropa Şurası ve OSCEniñ işbirligi ile faal areketler Qırımdaki ve Donbastaki insanlar içün deñişmeler yapar, olar halqara birdemlik ve destekke muhtaclar», – dedi Tsımbalük.
Bu toplaşuvda Amerika Birleşken Devletleri Rusiyeni Qızıl Haç Halqara komiteti ve OSCE Mahsus monitoring missiyasınıñ Qırımnen beraber Ukraina toprağına kirmesini temin etmesine çağırdı.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
