Link açıqlığı

Saatnıñ esas haberi

Qırımda «Çaqmama davası»: mudafaa tarafı Enver Topçiniñ ükmüni temyiz etecek ola - advokat


Advokat Emil Kürbedinov
Advokat Emil Kürbedinov

Mudafaa tarafı Rusiye Ceza qanunnamesiniñ 205.6 maddesine binaen (cinayet aqqında haber etmeme) qabaatlanğan qırımlı Enver Topçige çıqarılğan ükümni i temyiz etecek ola. Bunı Qırım.Aqiqat mühbirine advokat Emil Kürbedinov bildirdi.

«Elbette İçki rayon mahkemesiniñ qararını temyiz etecekmiz. İlk-evelâ halqara instantsiyalarğa muracaat etip olmamız içün. Çünki bu saçma-sapan üküm boyunca adaletni tek anda qazana bilemiz», – dedi Kürbedinov.

Rusiye nezaretinde olğan Qırımnıñ İçki rayon mahkemesi qırımlı Enver Topçige üküm çıqardı. Mahkemeci Topçini 40 biñ ruble para cezası berilmesine mahküm etti​.

Martnıñ başında olğan mahkemede dinşınas, bundan evel ise FSB şaatları ve gizli şaat sorğuğa çekildi.

Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.

Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.

Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».

Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.

XS
SM
MD
LG