Qırımnıñ Rusiye ükümetiniñ baş nazir muavini Yelena Romanovskaya Qırım hastahanelerinde ağır alda bulunğan yedi koronavirus hastası aqqında haber ete.
Bu aqta o, mayısnıñ 16-nda COVID-19 ile küreş operativ ştabınıñ toplaşuvında ayttı.
«136 hastamıznıñ alı orta ağır, yedi insan ağır alda buluna, 1945 senesi doğğan bir qadın, ne yazıq ki, invaziv aqcigerlerni suniy avalandıruvğa keçirildi, eki hasta invaziv olmağan aqcigerlerni suniv avalandıruv cihazına bağlandı», – dedi Romanovskaya.
Keçken künü Qırımda 13 yañı koronavirus hastası qayd etildi. Böylece, Qırımda 272 koronavirus hastası qayd etildi. 24-ü çetelden keldi, 26-sı Rusiyeden keldi. Eki kişi vefat etti. Akimiyetniñ malümatına köre, daa eki hastanıñ ölüm sebebi belli degil, amma COVID-19 diagnozı qoyulğan edi. Aqyarda 135 kişi koronavirus yuqunçına oğradı, 65 insan tüzeldi, eki kişi vefat etti.
Mayısnıñ 18-nde Qırımda özüni izolâtsiya etüv rejimi lâğu etile, amma maska taquv rejimi qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
