Partenit qasabasında (Aluşta) mayısnıñ 30-ında eki qatlı baraq evinde yanğın çıqtı, onıñ neticesinde 65 yaşındaki qadın elâk oldı. Baraqta yaşağan 17 qoranta meskensiz qaldı.
Bu aqta Rusiye FVN-niñ Qırım idaresi bildirmekte.
Müessiseniñ başı Sergey Şahov haber etkeni kibi, şimdi belli olğanına köre, yanğın ekinci qattı çıqtı ve umumen 200 metr kvadrat mıntaqasını qapladı. Onıñ malümatına köre, binada 42 adam yaşay edi, olardan 12-si balalar.
“Vaqia yerinde pek tütünli edi, ve bina tez yanğan malzemeden yapılğanından sebep, ateş qısqa vaqıtta büyük mıntaqanı qapladı ve evniñ damına da tiydi. Sakinler özleri binadan çıqtı”, - dedi Şahov.
Keçken afta Yaltada doquz qatlı evniñ dörtünci qatında yanğın çıqqan edi, 10 adam tahliye etilgen edi.
