Rusiyeniñ nezareti astında olğan Qarasuvbazar mahkemesi uquq qoruyıcı Cepparovğa "malümat azatlığı suistimalı" qabaatı ile 40 biñ ruble para cezasını tayin etken. Bunı "Qırım esnası" uquq qoruyıcı teşkilâtı haber ete.
"Mahkemede eki şaat sorğuğa çekilecegi beklenile edi. Olar Rusiye quvetçileriniñ sözlerine köre, Cepparovğa protokol tizilgende anda edi ekenler. Uquq qoruyıcı özü protokollar onıñ iştiragi olmadan tizilgenini ve olarnıñ aqqında tek mahkemege davet etilgende bilgenini iddia ete. Mudafaa taarfı eki şaatnıñ da sorğuğa çekilmesi istedi", - dep yazıla bildirmede.
"Qırım esnası" haber etkeni kibi, şaatlar mahkeme oturışına kelmegenler. Amma buña baqmadan mahkemeci davanıñ baqıluvını başqa künge qaldırmağan. Uquq qoruyıcı mahkeme qararına qarşı istinaf şikâyetini bermek niyetinde.
Evel RF quvetçileri qırımtatar uquq qoruyıcısı Abdureşit Cepparovğa qarşı "Rusiye ordusını itibardan tüşürüv" ve "malümat azatlığı suistimalı" maddeleri ile eki yañı memuriy dava açqan edi.
ZMINA uquq qoruyıcı teşkilâtı haber etkeni kibi, qabaatlavlarnıñ asılı uquq qoruyıcı güya Qırımda halqara gumanitar uquqınıñ bozulması ile bağlı baqmalarnı ve yarımadada insan aqlarınıñ bozulması ile bağlı operativ beyanatlra derc etilgen "Qırım ğayesi" teşebbüsiniñ saifesini idare etkeninden ibaret eken.
Cepparov ise bu qabaatlavlarğa razı degil. Onıñ sözlerine köre, "Qırım ğayesi"niñ yaratılmasına alâqası olsa da, al-azırda bu uquq qoruyıcı leyhasınıñ faaliyetine alâqı yoq eken.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
