Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılıp tevqif etilgen 23 qırımtatarını Aqmescit SİZOsı ve Vaqtınca tutuv izolâtorında tapıp olamaylar. İmayeniñ tahminlerine köre, olarnı Qırımdan Rusiyege alıp kete bileler. Bu aqta advokat Edem Semedlâyev bildirdi.
«Bugün vaqtınca tutuv izolâtorına bardım. Anda olar yoqlar dep aytalar. SİZOda olarnı tahqiqat tedbirlerine alıp ketkenler, dep bildireler, amma advokatlardan iç birisi bunı bilmey. Ne SİZO, ne de Vaqtınca tutuv izolâtorında bir şey qabul etilmey. Mahsus tedbirlerni Rusiye FSBsiniñ Tahqiqat idaresi yolbaşçısınıñ muavini Vasiliy Petuhov idare etkenine esaslansaq, olarnı Moskva ya da Rostovğa alıp ketmeleri mümkün», – dedi Semedlâyev.
Rusiye uquq qoruyıcıları tutulğanlarnıñ advokatları bergen malümatnı izaatlamay.
Bundan ğayrı, 24-ünci şübheli Edem Yayaçikovnıñ bulunğan yeri belli degil.
«Maşinası tapılğan, amma özü aqqında bir malümat yoq. sessizlik. Er şey ola bile», – dedi advokat.
Tünevin Yayaçikovnıñ ömür arqadaşı Susanna politsiyağa aqayı hırsızlanğanına dair ariza berdi.
Martnıñ 27-nde Aqmescitniñ Kiyev rayon mahkemesi tutulğan doquz qırımtatar faalini tevqif etti. Martnıñ 28-nde Aqmescitniñ rayon mahkemesi martnıñ 27-nde Rusiye uquq qoruyıcıları tarafından tutulğanlardan 14 qırımtatar faalini apiske aldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Faallerniñ malümatına köre, 20 kişi tutuldı.
Aqmescitniñ Bavurçı qasabasında keçirilgen tintüv vaqtında semetdeşlerine qoltutmağa kelgenlerden eki kişi Eskender Mamutov ve Emil Ziyadinov da tutuldı. Aqmescit mahkemesi Ziyadinovğa «politsiyağa qarşı çıqqanı içün» 500 ruble para cezasını berdi. Mamutov ise 5 künge apiske alındı.
Rusiye FSBsi Qırımda tintüvler keçirilgenini tasdıqlap, şübhelilerniñ sayısını ve olarnıñ soyadlarını aydınlatmadı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
