Rusiye FSBsiniñ hadimleri «oquv yurtlarında terror ücümlerini azırlağanından» şübheli sayıp tutqan eki keriçli genç Aqmescit mahkemesine ketirildi, mında olarnıñ sıñırlav tedbiri belgilenecek, dep haber ete akimiyetke qoltutqan «Krıminform» saytı.
Fevralniñ 18-nde Rusiye FSBsi Keriçniñ oquv yurtlarında terror ücümlerini azırlağanından şübheli sayılğan 2003 ve 2004 seneleri doğma eki gençni tuttı, dep bildirdi. Müessiseniñ bildirgenine köre, yaqalanğanlar «2018 senesi oktâbr ayında Keriç politehnik kollecinde 20 insannı öldürgen 18 yaşında Vâçeslav Roslâkovnıñ izdeşleri, ekstremist mefküresiniñ tarafdarları» ola.
Rusiye Tahqiqat komitetiniñ yolbaşçısı bu dava tahqiqatını tezleştirmege emir etti.
Bundan soñ Qırım ve Aqyardaki Rusiye Tahqiqat komitetiniñ idaresi bu cinaiy davanı özü baqıp başladı.
Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovadan Rusiye FSBsi tutqan ve şeerniñ eki oquv yurtunda terror ücümlerini azırlağanından şübheli sayılğan çağına yetmegen eki Keriç sakini aqqında malümat bermesini talap etti.
