Faallerniñ malümatına köre, Qırımnıñ eñ yüksek ⁇ Uçan-Su şelalesi qurudı, Aqmescitniñ ihtiyacları içün Partisan suv anbarını beslegen Alma özeniniñ ve Qara özeniniñ suvu qurudı, Burulça özeni qurup tura, çoqusı küçük özenler qurudı, çoqusı çeşmelerden suv ketti, Qırım suv anbarlarında suv seviyesi tez tüşe.
"Qırımnıñ rusiyeli akimiyeti yılnıñ başında, çoq yağğan yağanaqlar vaqtında toplanğan suv yedekleri bir buçuq yılğa yetecek, dep aytqan edi, amma kimse böyle anomal sıcaq ve mart ayında başlağan qurğaqlıqnı beklemey edi. Şunıñ içün bu tahminler endi çalışmay. Yanğınlar Qırımnı qaplap aldı. Qurğaqlıq köy hocalığına da tesir ete, sütniñ fiyatı köterildi, çünki sütniñ fiyatı mevsimge köre tüşmedi", — dep haber ete #LiberateCrimea faali.
Faallerniñ qayd etkenine köre, ticaret ağları, arttıruv talabından faydalanıp, Qırımda suv fiyatlarını köterdiler.
"Mağazalarda suv fiyatlarınıñ artması körüne, tek yazda fiyat üçte birge arttı. Bazı iş adamları müşterileriniñ suvsızlığını istismar eteler, meselâ, "Taygan" arslanlar parkında yarım litr suv şişesi eñ azı yüz rublege satıla. Bizim malümatımızğa köre, anda küneşten zarar körgenlerniñ sayısı çoq, amma bedava suv stantsiyalarını qoymaq yerine, olar anda suvnı dört qat paalığa satalar. Teessüf ki, Qırımdaki Rusiye fiyat ve tarifler boyunca Devlet komiteti çalışmay", — dep qayd etti #LiberateCrimea faalleri.
İyül 19-dan başlap Qırımda yüksek yanğın telükesi sebebinden qoruqlarda aman-aman bütün ekologik-maarif marşrutları qapatıldı.
Rusiye tarafından ilhaq etilgen Qırımda devam etken qurğaqlıq ve yüksek ava arareti sebebinden iyün ayından başlap suv obyektleriniñ toldurılması vaziyeti fenalaşa başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
