Qırımnıñ Rusiye kontrolindeki mahkemesi, devlet hainliginde qabaatlanğan 33 yaşındaki Simeiz qasabasınıñ sakinini 16 yılğa azatlıqtan marum etti. Bunı Qırımnıñ Rusiye prokuraturası bildire.
Tahqiqatnıñ malümatına köre, erkek, "mahsus arbiy ameliyatınıñ keçirilmesine qarşı çıqıp", Ukrayina İstihbarat Baş idaresiniñ vekili ile bağ qurğan.
Qayd etilgenine köre, o, "Aqyar şeerinden ketkende, Rusiye Federatsiyasınıñ Qara deñiz flotunıñ arbiy gemilerinden birisini fotoğa çekti ve toplanğan bütün malümatnı çetel devletiniñ vekiline mesencerlerden birinde berdi".
Qırım yarımadasınıñ sakini Rusiye FSB-siniñ hadimleri tarafından tutuldı.
Rusiye mahkemesi Simeiz sakinini 16 yıl sert rejimli tüzetüv koloniyasında qalmasına ve 1 yıl 10 ayğa azatlıqtan marum etilmesine üküm etti.
Resmiy malümatqa köre, üküm qanuniy quvetini almadı.
Qabaatlanğannıñ adı ve soyadı bildirilmey, onıñ açıq izaatları da yoq.
Ukrayina Mudafaa nazirliginiñ matbuat hızmeti bu haberni izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qol tutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürgeni" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler.