Rusiye quvetçileriniñ fikrince, Ukrayina Mudafaa nazirliginiñ Baş istihbarat idaresinen işbirlik yapqan Aqyar sakinine qarşı Rusiye kontrolindeki Qırım Yuqarı mahkemesine qabaatlav yollanıldı. Bu aqta İlk küzniñ 30-nda Qırımnıñ Rusiye prokuraturası bildirdi.
Berilgen malümatqa köre, erkek, "mahsus arbiy ameliyatnıñ keçirilmesine qarşı çıqqan" olaraq, Ukrayin istihbaratınıñ vekillerine Rusiye Federatsiyasınıñ Qara deñiz flotunıñ bölüginiñ bulunğan yeri aqqında malümat bergen. Cenk şaraitlerinde Rusiye quvetçileriniñ versiyasını teşkermek imkânsızdır.
Qabaatlanğannıñ adı ve soyadı bildirilmey, onıñ açıq izaatları da yoq. Rusiye mahkemesinde qabaatı isbatlansa, oña 20 yılğa qadar apis cezası berile bile.
Ukrayina Mudafaa nazirliginiñ matbuat hızmeti bu haberni izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qol tutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar RF ordusını "itibardan tüşürgeni" içün yaqalana ve memuriy ve cinaiy mesüliyetke çekile.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler.