Kreml kontrolindeki Qırımnıñ Qarasuvbazar rayon mahkemesi 16 yaşında qırımtatarı Abduraman Abduveliyevni Rusiye Ceza kodeksiniñ 329-ıncı maddesine istinaden («Rusiyeniñ devlet alemi ya da Rusiyeniñ devlet bayrağını aramlav») qabaatlap, azatlığını altı ayğa sıñırladı. Bu aqta Qırım.Aqiqat mühbiri bildire.
Bu qararnı qadı Aleksandr Aleynik çıqardı.
Rusiye tahqiqatınıñ malümatına köre, 2018 senesi mayısnıñ 21-nde Abduveliyev Qışlav (Kurskoye) köyüniñ köy şurası, mektep yanındaki abide ve köy klubından üç Rusiye bayrağını alıp taşladı. Eki aydan soñ rayonda bunıñnen bağlı bir sıra tintüv keçirildi.
«O künü qardaşımnen beraber olğan balalar ya şaat, ya qabaatlayıcı ola, qardaşım Sudaq rayonındaki mektepte oquy. Mahkeme qararına baqılsa, qardaşım mektepke nasıl qatnaycaq belli degil. Çünki yarım yıl devamında köyden çıqmamalı ve çıqmağa istegen er seferinde haber etmeli», – dep izaatladı mahkeme qararını Abduramannıñ tatası Esma Abduveliyeva.
İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başlandı.
