İşğal etilgen Qırımda Rusiye tahqiqatçıları qırımtatar halqınıñ lideri Mustafa Cemilevni ilk tahqiqat çerçivesinde üç maddege istinaden qabaatladı. Rusiye Tahqiqat komiteti idaresiniñ tahqiqat tedbirlerinde iştirak etken Cemilevniñ advokatı Nikolay Polozovnıñ Qırım.Aqiqat mühbirine bildirgenine köre, Cemilevge qarşı oğlu Hayserniñ ukrain davası qullanıla.
Polozovnıñ qayd etkenine köre, Mustafa Cemilev Rusiye Ceza kodeksiniñ 322 maddesiniñ 3-ünci qısmı – «Rusiye devlet sıñırından qanunsız keçüv», 222 maddeniñ 1-inci qısmı – «Silâ, onıñ parçalarını qanunsız aluv, berüv, satuv, saqlav ya da taşuv», 224 maddeniñ 1-inci qısmı – «Silânı diqqatsız saqlav» istinaden qabaatlana.
Advokatnıñ bildirgenine köre, birinci dava 2014 senesi mayısnıñ 3-nde olğan vaqialarnen bağlı, o künü Mustafa Cemilev Herson vilâyetiniñ memuriy sıñırındaki «Armânsk» Rusiye keçiş noqtasından işğal etilgen Qırımğa kirmege tırıştı. Onı kirsetmediler ve o, Kyivge ketmege mecbur oldı.
«Ekinci ve üçünci maddeni aytsaq, Tahqiqat komitetiniñ versiyasına köre, olar Mustafa Cemilevniñ oğlu Haysernen bağlı, o, 2013 senesi mayıs ayında Bağçasaraydaki eviniñ azbarında babasınıñ tüfeginden apansızdan ateş açıp, qoranta tanışını öldürdi. Bu davanıñ mahkemesi başta Ukrainada oldı, amma Qırım işğalinden soñ onı Krasnodarğa avuştırğanlar. Bu maddeler şimdi babasına qarşı qullanıla. Vesiqalarnı tedqiq etip başlağanda bir qısmınıñ ukrain tilinde olğanını kördim. Yani yarımada işğalinden evel arhivlerde olğan vesiqalarnı Rusiye Tahqiqat komiteti şimdi yañı davalarnı açmaq içün qullana», – dep qayd etti Polozov.
Onıñ aytqanına köre, Mustafa Cemilevniñ ve Qırımtatar Milliy Meclisiniñ reisi Refat Çubarovnıñ davasında bir tahqiqatçı bar – Magomed Magomedov.
«Cemilevniñ davasında tahqiqatçı tahqiqat tedbirleri başlamazdan evel maña bildirmemezlik senetini imzalamağa teklif etti. Men red etip, vesiqa ifadeleri tam degil dedim, ve tahqiqatçı eki şaatnıñ yanında red cevabımnı qayd etti», – dedi Polozov.
Onıñ bildirgenine köre, Çubarovğa qarşı ilk tahqiqat vesiqalarını körip olamadı, «çünki tahqiqatçı olarnı bermege azır degil edi».
Rusiye Tahqiqat komiteti ve Qırım ve Aqyardaki idaresiniñ saytında Mustafa Cemilevge qarşı tahqiqat areketleri aqqında malümat ve advokat qayd etken tahqiqatçı izaatları yoq.
Daa evel Cemilevniñ Qırım.Aqiqatqa tasdıqlağanına köre, Qırımda Rusiye Tahqiqat komitetiniñ hadimleri onı qabaatlamağa azırlana. Advokatı Nikolay Polozov, Tahqiqat komiteti qabaatlav kününi başqa vaqıtqa qaldırdı, dep bildirdi.
Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.
2014 senesiniñ başında Rusiye Qırımnı işğal etken soñ Rusiye akimiyeti qırımtatarlarnıñ liderleri Refat Çubarov, Mustafa Cemilevniñ yarımadağa kirişini beş yılğa yasaqladı.
2016 senesi yanvarniñ 20-nde qırımlı advokat Cemil Temişev Rusiye kontrolindeki Aqmescit Kiyev rayon mahkemesiniñ qararı esasında Mustafa Cemilevniñ ğıyabiy apiske alınması aqqında bildirdi. Bu malümatnı daa soñra Qırımnıñ sabıq Rusiye prokurorı Natalya Poklonskaya da tasdıqladı.
Temişevniñ malümatına köre, Rusiye organları Cemilevni 2014 senesi mayısnıñ 3-nde Ermeni Bazarda Qırımnıñ memuriy sıñırından qanunsız keçkeninde qabaatlay. Rusiye tahqiqatı, Rusiye Cemilevniñ yarımadağa kirişini endi yasaqlağan edi, dep bildire.
Ukraina Tış işler nazirligi Mustafa Cemilevniñ Rusiye mahkemesi tarafından ğıyabiy apiske alınmasını takbih etti.
