Qırımda mayısnıñ 28-31-nde fevqulâde yanğın telükesi olacaq, dep bildire Qırımdaki Rusiye Fevqulâde vaziyetler hızmeti idaresiniñ matbuat hızmeti «Qırımnıñ gidrometeorologiya ve tabiat monitoringi idaresiniñ» malümatına esaslanıp.
Fevqulâde vaziyetler nazirliginiñ qayd etkenine köre, yüksek yanğın telükesi sebebinden yanğınğa oğraması mümkün olğan yerler yanında ateş yaqmağa, mangal qullanmağa, tütün içmege, yanğan sernik taşlamağa, pirotehnik mahsullarnı qullanmağa, benzin, kerosin ya da diger yanğan madde ile yağlanğan şeylerni qaldırmağa, küneş tüşken orman alanlarında şişe, diger çöplükni qaldırmağa, terek tübünde, alanlarda ot yaqmağa yasaq etile.
Hatırlatamız, Qırımda mayısnıñ 27-nde fevqulâde yanğın telükesi sebebinden furtuna havfı ilân etilgen edi.
Qayd etilgeni kibi, Qırımda aprelniñ 1-nden itibaren yüksek yanğın seviyesi ilân etile.
Müessise yarımada sakinleri ve musafirlerini ormanda yanğın telükesizligi qaidelerine riayet etmelerine çağıra.
2018 senesi sentâbrniñ ortasına qadar Qırımda yüksek yanğın telükesi bar olğanından sebep ormanlarnıñ ziyaret etilmesi yasaqlanğan edi.
Keçken sene avgust ayında Yalta civarındaki Uç-Koş deresinde üç kün devam etken orman yanğını söndürilgen edi. Fevqulâde vaziyetler nazirliginiñ malümatına köre, qoruq ormanınıñ tahminen 26 gektarı yandı.
