Bağçasaraydaki üçünci «Hizb ut-Tahrir davasınıñ» mabüsi Osman Seytumerov pnevmoniyanen hastalandı ve sentâbrniñ 20-nde tahqiqat izolâtorınıñ tibbiy bölügine acele alındı, dep bildire «Qırım birdemligi» birleşmesine advokat Emine Avamileva.
Onıñ malümatına köre, apiske alınğan faal Aqmescitte FSBde keçirilgen tahqiqat tedbirleri vaqtında yaramadı. Advokatnıñ aytqanına köre, anda Seytumerovnı sıcaq ve belli hastalıq alâmetlerine baqmadan SİZOdan ketirgenler.
«SİZO hadimleri sıcaqnı ölçmey, mabüslerniñ şikâyetlerine qulaq asmay, olarnı SİZOdan çıqaralar. Seytumerov Osmannıñ tünevin sabadan berli yüksek sıcağı bar edi, yaramay is etkenini aytqan edi. FSB idaresinde yaramadı. Osmannıñ ağası Seytumer Seytumerov bir qaç kere rica etken soñ tahqiqatçı acele yardım çağırmağa mecbur edi, acele yardım 38.2 sıcağı olğanını ayttı. Sıcaq tüşürici, ağrı kesici ine urğandırlar. Onı tahqiqatçınen beraber SİZOğa qaytarğanlar. Anda müvekkilimni bir qaç künge tibbiy bölükke yerleştirmege qarar alğanlar», – dep bildirdi Avamileva.
Onıñ malümatına köre, acele yardım hadimi Seytumerovnıñ sağ taraf pnevmoniyası olğanını bildirdi. Advokatnıñ qayd etkenine köre, «apiske alınğan faalge tibbiy yardım kösterile, em de yarın SİZO tibbiy bölügine berilmesi kere olğan ilâclar berildi».
«İmayeniñ prokuratura, nezaret prokurorı ve, elbette, Rospotrebnadzorğa muracaat etmek niyeti bar, SİZOda tutulğan şahıslarğa kösterilgen tibbiy yardım nasıl kösterilgeninen bağlı muracaat olacaq», – dep bildirdi advokat.
Diger menbalar bu malümatnı şimdilik tasdıqlamay. Aqmescit SİZOsı advokatnıñ aytqanlarını izaatlamay.
Martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri keçirildi. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
