«Fevral 26 davası» boyunca mahküm etilgen Eskender Emirvaliyevniñ babası ve qardaşı Rusiye prokuraturasına çağırıla. Bu aqta «Qırım birdemligi» faalleriniñ elinde olğan celpname kopiyasında aytıla.
«Prokurornıñ emrini yerine ketirmek içün milletlerara munasebetlerge riayet etüv, ekstremist faaliyetine qarşı areketler teşkerile. Keçirilgen teşkerüv sebebinden Aluşta şeeriniñ Lenin soq., 44 adresinde yerleşken şeer prokuraturasına №4 odağa şeer prokurorınıñ yardımcısı Didun M.İ.-ge kelip, teşkerüvge belli malümatnı izaatlamañız kerek», – dep aytıla celpnamede.
Celpname boyunca kelmeseler, Emirvaliyevlerge olacaq mesüliyet aqqında bildireler.
«Aynı vaqıtta, «Rusiye prokuraturası» Federal qanunınıñ 6-ncı maddesiniñ 3-ünci qısmındaki talaplarğa köre «prokurornıñ vekâletlerinden kelgen talaplarınıñ yerine ketirilüvi ve onıñ celpnamesine köre kelmegenlerni Rusiye Memuriy cinayetler kodeksiniñ 17.7 maddesine köre mesüliyet bekley, dep añlatam», – dep aytıla vesiqada.
2014 senesi fevralniñ 26-nda Qırım parlamentiniñ binası ögünde Ukraina topraq bütünliginiñ tarafdarları ve duşmanlarınıñ büyük mitingi olıp keçti. Qırımtatar ve Ukraina tarafdarı faallerine qarşı Rusiye tarafdarı faaller çıqtı.
2015 senesi yanvar ayında Rusiye Tahqiqat komitetiniñ Qırım idaresi fevralniñ 26-nda mitingde olğan qalabalıqlar aqqında cinaiy dava açtı.
Ukraina topraq bütünligine qoltutqanlar tutuldı: Qırımtatar Milliy Meclisiniñ reis muavini Ahtem Çiygoz, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev.
Daa soñra mahkeme «fevral 26 davasını» ekige böldi: o vaqıt Qırımda Meclis lideriniñ rolüni alğan baş şübheli Ahtem Çiygoz ayrı esnasqa alındı.
Advokat Cemil Temişevniñ teşebbüsinen faal Talât Yunusov ve ATR telekanalınıñ operatorı Eskender Nebiyev tahqiqatnen işbirligi yapıp, olarnıñ ifadeleri «fevral 26 davası» diger mabüsleriniñ davalarında delil olmaycaq şartınen qabaatlarını tanıdı. 2015 senesi dekabr ayında Talât Yunusov 3,5 yılğa, Eskender Nebiyev eki yılğa şartlı olaraq üküm etildi.
2017 senesi sentâbrniñ 11-nde Rusiye mahkemesi yarımadanıñ Rusiye işğalinen bağlı narazılıqlarnı «qalabalıqlar» dep adlandırıp, Çiygoznı olarnı teşkil etkeninde qabaatladı ve sekiz yıl sert rejimli koloniyada qalmasına üküm etti. 2017 senesi oktâbrniñ 25-nde Rusiye akimiyeti Qırımda mahküm etilgen Ahtem Çiygoznı azat etip, onı Türkiyege teslim etti. Daa soñra o, Kyivge keldi.
2018 senesi iyünniñ 19-nda Kreml kontrolindeki Aqmescitniñ Merkeziy rayon mahkemesi «fevral 26 davasınıñ» mabüslerine şartlı apis cezalarını berdi. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ayğa şartlı olaraq üküm etildi, er birine 3 yıl sınav müddeti berildi.
2020 senesi fevralniñ 4-nde sınav müddeti bitmegen «fevral 26 davasınıñ» mabüsi Mustafa Degermencige qarşı cinaiy mahkümiyetniñ lâğu etilgeni belli oldı.
