Rusiye kontrolindeki Qırım Sağlıq nazirligi koronavirustan vefat etken daa bir insan aqqında bildire.
Böylece, Qırımda iyülniñ 24-ne qadar 14 kişi COVID-19-dan vefat etti. Müessise yañı ölüm aqqında tafsilâtlı malümat bermey.
Umumen, Qırım akimiyetiniñ malümatına köre, 1854 insan tibbiy közetüv altında buluna, 1239 kişi evde dinamik közetüv altında qala, 493 kişi hastahanede yata, 122 insan observatorlarğa alındı. 230 insan hastahanede tedaviylene, yahşı olğan 794 kişi hastahaneden çıqarıldı.
Keçken künü Qırımda 18 yañı koronavirus hastası qayd etildi, dep bildirdi Qırımnıñ Rusiye yolbaşçısı Sergey Aksenov.
Umumen Qırımda 1056 koronavirus hastası qayd etildi. 67-si çetelden keldi, 106-sı qomşu Rusiyeden kelgenler ve olarnen alâqada olğanlar. 794 insan yahşı oldı. Aqyarda 306 insan yañı koronavirus yuqunçına oğradı, 245 kişi yahşı oldı, 6 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
