Keçken künü Qırımda 203 yañı koronavirus hastası qayd etildi, 33-üniñ hastalıq alâmetleri yoq, dep bildirdi noyabrniñ 20-nde Qırımnıñ Rusiye yolbaşçısı Sergey Aksenov.
«Hastalardan tek 112-si tibbiy yardım içün muracaat etkende qayd etildi, 91-i daa evel qayd etilgen hastalarnen alâqada oldı», – dep aytıla içtimaiy ağlardaki haberinde.
Aksenovnıñ malümatına köre, keçken künü yañı koronavirus tedqiqlerini yapqan Qırım laboratoriyaları 4382 insannı teşkerdi. Umumen 8933 insan tüzeldi.
Rospotrebnadzor, yarımadada COVID-19 hastalarınıñ sayısı dekabrniñ ortasında pek artacaq dep bekleyler, dep qayd etti. Qırım akimiyeti dekabrniñ 20-nden başlap gece eglence yerleriniñ işini yasaqlamağa qarar aldı – saat 22:00-dan 8:00-ğa qabdar. Şeer meydanlarında olacaq Yañı yıl tedbirleriniñ keçirilüvi de lâğu etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
