Qırımda keçken künü 126 yañı koronavirus hastası qayd etildi, aynı zamanda 8-niñ hastalıq alâmetleri yoq edi, dep haber etti fevralnıñ 18-nde Qırımnıñ Rusiye başı Sergey Aksönov.
"Hasta olğanlarnıñ umumiy sayısından 105 adam tibbiy yardım içün muracaat etkende qayd etildi, 21 daa evel qayd etilgen hastalarnen alâqada oldı", – dep yazıla bildirmede.
Berilgen malümatqa köre bir künde koronavirus yuqunçından 6 hasta ölgen, pandemiya başlanğandan berli ise 877.
“2605 insan (COVID) ambulator tedaviylevde, 1552 kişi (COVID ve pnevmoniya) hastahanede buluna. Pandemiya başlanğanından berli Qırımda umumen 34898 COVID-19 hastası qayd etildi, 30550 kişi tedaviylengen soñ yiberildi” – dep yazıla müessiseniñ beyanatında.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
