Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, yarımadada koronavirus hastalarınıñ sayısı arta.
«Vaziyet eyileşmey, eki aftadan berli hasta sayısı arta. Soñki eki künde bir künlik koronavirus hastalarınıñ sayısı ilk sefer Rusiyeniñ orta seviyesini aştı», – dep ayttı Penkovskaya dekabrniñ 19-nda COVID -19 ile küreş operativ ştabınıñ toplaşuvında.
Onıñ aytqanına köre, koronavirus hastalarınıñ sayısı artmağa devam ete.
Penkovskaya qayd etkenine köre, bunıñ sebebi epidemiya ile küreş ve profilaktika rejiminiñ bozuluvı ola.
Keçken künü Qırımda 354 koronavirus hastası qayd etildi.
Qırımnıñ Rusiye sağlıq nazirligi bildirgenine köre, pandemiya başlağanından bu yuqunçtan 385 kişi vefat etti.
Aqyarda, soñki malümatqa köre, yılnıñ başından 5445 kişi yañı koronavirus yuqunçına oğradı, 5041 insan tüzeldi, 175 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
