Rusiye kontrolindeki Qırım Sağlıq naziri İgor Çemodanovnıñ bildirgenine köre, Qırımda 2902 insan tibbiy közetüv altında buluna, bir künde 196 kişi daa qoşuldı. 66 insan hastahanede buluna.
Bu aqta o, aprelniñ 1-nde koronavirusnen bağlı operativ ştab toplaşuvında ayttı.
«Bugünki künde 2902 insan tibbiy közetüv altında buluna. Dinamik közetüv altında – 2826 insan. Bir künde 196 insan daa tibbiy közetüv altına alındı. 126 insan hastahaneden çıqtı. 56 insan hastahanede qala. Bir künde altı kişi ketirildi, dört kişi çıqarıldı. 13 insan observatorda qala», – dep bildirdi Çemodanov.
Aynı vaqıtta, Qırımnıñ Rusiye Sağlıq nazirliginiñ saytında berilgen malümatqa köre, yarımadada tibbiy közetüv altında 2905 kişi qala.
Qırım ve Aqyardaki Rospotrebnadşçor idaresiniñ yolbaşçısı Natalya Penkovskayanıñ qayd etkenine köre, eki kişi özüni tecrit etüv rejimini bozğanı içün Kezlevge observatorğa mecburen yolladılar.
Qırımnıñ Rusiye yolbaşçısı Sergey Aksenovnıñ bildirgenine köre, Keriç köprüde gece blokpostlar qurulacaq. Onıñ fikirince, koronavirus tarqaluv telükesi bar olğanından karantin tedbirleri bir aftağa daa uzatılacaq.
Rusiye kontrolindeki Qırım Sağlıq nazirliginiñ martnıñ 31-nde bildirgenine köre, 2832 insan tibbiy közetüv altında buluna, 2758-i evde dinamik közetüv, 64 kişi hastahanede, 10 insan observatorlarda buluna.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Martnıñ 31-nde Aqyar kirişlerinde blokpostlar quruldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
