İşğal altındaki Qırımda iyülniñ 17-nde 12 koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
«Üçü çetelden keldi, 4-ü tibbiy yardım içün muracaat etkende qayd etildi, 2-si daa evel qayd etilgen hastalarnen alâqada oldı, 3-ü sağlam insannıñ skriningi neticesinde belli oldı», – dep yazdı Aksenov Facebookta.
Umumen, Qırımnıñ Rusiye akimiyetiniñ malümatına köre, 943 yañı koronavirus hastası qayd etildi. 62-si çetelden keldi, 101-i qomşu Rusiyeden kelgenler ve olarnen alâqada olğanlar. 672 hasta tibbiy yardım içün muracaat etkende ve hastalarnen alâqada olğanından qayd etildi, 108 hasta sağlam insannıñ skriningi neticesinde belli oldı. Keçken künleri yañı koronavirus yuqunçını tedqiq etken laboratoriyalar 2339 insannıñ talilini yaptı. 721 insan yahşı oldı.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
