Qırımda keçken künü 5 hasta koronavirus yuqunçından öldi, pandemiya vaqtında 1172 kişi oldı, dep yazıla Qırımnıñ Rusiye sağlıq saqlav nazirliginiñ er künlik monitoring malümatında.
Berilgen malümatqa köre 446 insan (COVID) ambulator tedaviylevde, 1473 kişi (COVID ve pnevmoniya) hastahanede buluna.
«Tedaviylevni devam etkenlerden 114 hasta ağır ve pek ağır aldadar, 6 adam aqcigerniñ invaziv avalandırıluvında, 24 aqcigerniñ invaziv olmağan avalandırıluvında. Çoq sayıda hasta öz-özüni tedaviylemege devam ete ve ağır ve pek ağır alda ketirileler», – dedi aprelniñ 21-nde Qırım Sağlıq saqlav nazirliginiñ başı Aleksandr Ostapenko.
Tünevin Qırımda 102 yañı koronavirus hastası qayd etildi, aynı zamanda 13-niñ hastalıq alâmetleri yoq edi. Bir künde 122, bütün vaqıt devamında ise 36 784 hasta tedaviylendi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
